Hvað er hreyfiflæði?

Hreyfiflæði er æfingakerfi sem kemur frá Danmörku og kallast Fysio Flow á dönsku. Hreyfiflæði er þróað út frá vísindalegri þekkingu á taugalífeðlisfræði af sjúkraþjálfaranum Pernille Thomsen. Hreyfiflæði gengur út á að hreyfa og liðka til bandvefinn í líkamanum okkar. Markmiðið er að mýkja upp og gera bandvefinn eftirgefanlegri og hreyfanlegri,  minnka bólgur, auka vökvaflæðið í gegnum bandvefinn, flýta fyrir hreinsun af aukaefnum/óhreinindum sem fara í gegnum bandvefskerfið okkar.

Í Hreyfiflæði er unnið með liðkandi æfingar í gegnum allan líkamann, þar sem eru gerðar margar endurtekningar af sömu hreyfingunni í rólegum takti. Unnið er í æfingum með líkamann  í öllum stöðum, það er standandi, sitjandi, á fjórum fótum og í liggjandi stöðu.  Bandvefnum er skipt upp í sex mismunandi brautir og vinnur hver braut sem ein heild og eru æfingarnar sem eru gerðar hugsaðar út frá þessum brautum. Æfingarnar sem gerðar eru snúast því um að nota þá hreyfiferla sem eru líkamanum eðlislægir en ekki að vinna með réttar hreyfibrautir.

 Í hreyfiflæði er mikilvægt að leyfa önduninni að fljóta/flæða eðlilega með, og stjórnar hver og einn þáttakandi sínum hreyfingum út frá eigin getu. Hverjum tíma lýkur með stuttri slökun þar sem athygli er beint að öndun og reynt er að ná ró yfir líkamann.

Tilgangurinn með tímunum er að auka eða viðhalda hreyfiferlum og minnka verki í líkamanum. Hreyfiflæði hefur einnig jákvæð áhrif á stöðuskynið hjá okkur.

Hvað er bandvefurinn?

Bandvefurinn er í raun vefur sem liggur um allan líkamann og er tengdur öllu og tengir allt saman meðal annars vöðva, sinar, líffæri, bein og húð. Hægt er að skipta bandvefnum upp í nokkur lög sem eru meðal annars tengd saman með eftirgefanlegri himnu og með vökva. Til að auka og viðhalda hreyfanleikanum í bandvefnum þarf bandvefurinn bæði að teygjast (lengjast og styttast) og að hreyfa sig innbyrðis á milli laga. Sem sagt bandvefurinn þarf bæði að vera teygjanlegur og líka renna á milli innri laga.

Um bandvefinn rennur vökvi og aðstoðar bandvefskerfið sogæðakerfið við að flytja vökva um líkamann. Alltaf er mikilvægt að viðhalda mjúkum og vel hreyfanlegum bandvef sérstaklega ef eitlar hafa verið fjarlægðir.

Vökvinn sem flæðir um bandvefinn sér um að hreinsa óhreinindi úr bandvefnum og er þannig hluti af ónæmiskerfi líkamans.

Við aðgerðir og geislameðferðir getur myndast örvefur sem breytir samsetningu bandvefsins og hefur það áhrif á hreyfigetu líkamans.

Örvefur er kaos í vefnum okkar og myndast þar sem skaði hefur verið, eftir 10-12 vikur verður aukin stífleiki.  Því er   mikilvægt að liðka bandvefinn eins fljótt og hægt er eftir aðgerð og samhliða geislameðferð.

Það eru fleiri þættir en aðgerðir og geislameðferð sem geta haft áhrif á hreyfanleika bandvefsins, eins og hreyfingaleysi, kyrrseta, streituástand, lyfja- og andhormónameðferðir.